Sagal Cabdiwali Waxay Soomaaliya uga tagtay qaxooti ahaan, maanta se waxay ka mid tahay xildhibaannada Baarlamaanka Ingiriiska. Sagal Abdi-wali ayaa noqotay haweeneydii ugu horreysay ee Soomaali ah ee kursi ka hesha baarlamaanka UK.
Sagal Abdi-Wali waa siyaasi ka tirsan Xisbiga Shaqaalaha, oo ku guuleysatay doorashadii ku-celiska ahayd ee deegaanka Holborn iyo St Pancras ee London.
Waxay heshay 12,292 cod, iyadoo ka guuleysatay musharraxa Xisbiga Cagaaran, Zack Polanski.
Guusheedu waxay timid kadib markii Ra’iisul Wasaarihii hore ee Ingiriiska, Sir Keir Starmer, uu banneeyay kursiga xildhibaanimo ee deegaankaas.
Safarka Sagal wuxuu ka soo bilaabmay Soomaaliya, wuxuuna maanta ku suntan yahay guul taariikhi ah oo ay ka gaartay siyaasadda Ingiriiska.
Sagal waxay ku dhalatay Soomaaliya, waxayna dalka Ingiriiska tagtay iyadoo qaxooti ah.
Safarkeeda siyaasadeed ayaa hadda gaarsiiyay Baarlamaanka Westminster, halkaas oo ay ka mid noqon doonto xildhibaannada ka qayb qaata dejinta sharciyada iyo go’aamada saameeya malaayiin qof oo ku nool Britain.
Waxay sidoo kale astaan u tahay ka-qaybgalka sii kordhaya ee dadka asal ahaan ka soo jeeda bulshooyinka muhaajiriinta ah ee siyaasadda Britain.
Maxay guusheedu uga dhigan tahay Soomaalida ku nool Britain iyo kuwa dalkooda jooga?
Guusha Sagal waxay muhiimad gaar ah u leedahay bulshada Soomaaliyeed, gaar ahaan jiilka ku koray qurbaha, maadaama ay muujinayso in qof ka soo bilaabay nolol qaxootinimo uu gaari karo xilalka ugu sarreeya ee siyaasadda dalka uu magangelyada ka helay.
Hase yeeshee, waxa ay ku soo kordhin doonto siyaasadda Britain waxaa lagu qiimeyn doonaa mowqifyadeeda, shaqadeeda baarlamaan iyo sida ay u matasho dadka deegaanka Holborn iyo St Pancras.
Sagal Abdi-Wali waxay Soomaaliya uga tagtay qaxooti ahaan, balse waxay hadda taariikh ka sameysay siyaasadda Ingiriiska. Guusheedu waa guul shaqsiyeed, waxayna sidoo kale bog cusub u furtay matalaadda Soomaalida ee Baarlamaanka UK.
