Kooxda Al-Shabaab ayaa la wareegay deegaanka istaraatiijiga ah ee Teedaan iyo tuulooyinka Suuley iyo Xasan Raqay ee bariga gobolka Hiiraan, kaddib dagaallo socday dhowr maalmood oo sababay in ciidamada dowladda Soomaaliya iyo ciidamada deegaanka ee Macawiisleyda ay dib uga gurtaan goobahaas.
Dagaallada ayaa waxaa ka qeyb galay cutubyo ka tirsan Ciidanka Xoogga Dalka Soomaaliyeed, oo ay ku jiraan ciidamada sida gaarka ah u tababaran ee Gorgor, iyo ciidamada Macawiisleyda. Kadib dagaallada, Al-Shabaab ayaa la wareegtay saddexda deegaan, iyadoo sii ballaarisay gacanta ay ku hayso qaybo ka mid ah bariga Hiiraan.
Al-Shabaab ayaa sheegatay inay gacanta ku dhigtay qalab ciidan oo looga tagay goobihii lagu dagaallamay, isla markaana ay khasaaro culus gaarsiisay ciidamada dowladda iyo kuwa deegaanka. Si kastaba sheegashooyinkan si madax-bannaan looma xaqiijin, mana jirto war rasmi ah oo kasoo baxay Dowladda Federaalka Soomaaliya, Ciidanka Xoogga Dalka ama maamulka Hirshabeelle oo ku saabsan natiijada dagaalka.
La wareegidda Teedaan ayaa loo arkaa mid istaraatiiji ah, maadaama uu deegaanku ku yaallo waddo muhiim ah oo isku xirta Beledweyne, Matabaan, Guriceel iyo gobollada dhexe ee Soomaaliya. Gacanta Al-Shabaab ee deegaankaasi waxay saameyn ku yeelan kartaa dhaq-dhaqaaqa ciidamada iyo shacabka ee u dhexeeya gobollada Hiiraan, Galgaduud iyo Shabeellaha Dhexe, iyadoo sidoo kale kooxda u soo dhoweynaysa magaalada Beledweyne.
Dhacdadan ayaa sidoo kale loo arkaa dib-u-dhac kale oo ku yimid ciidamada dowladda iyo Macawiisleyda, kuwaas oo sannadihii 2022–2023 Al-Shabaab ka saaray deegaanno badan oo ka tirsan bariga Hiiraan.
Arrintan ayaa ku soo beegantay maalin un kadib markii Madaxweyne Xasan Sheekh Maxamuud uu Baarlamaanka ka sheegay in Al-Shabaab ay mareyso marxaladihii ugu liitay, isla markaana uu ballanqaaday in la dardargelin doono howlgalada ka dhanka ah kooxda.
Ilaa iyo hadda, Dowladda Federaalka Soomaaliya wax war rasmi ah kama soo saarin wararka sheegaya in la waayay gacan ku haynta saddexdaas deegaan, waxaana weli aan caddeyn in ciidamada dowladda ay qorsheynayaan guluf lagu dib ugu qabsanayo goobahaas.
