Khilaafaadka siyaasadeed ee Soomaaliya ayaa lagu tilmaamay mid kamid ah caqabadaha ugu waaweyn ee halis gelinaya mustaqbalka howlgalka AUSSOM iyo qorshaha loogu wareejin lahaa ciidamada Soomaaliyeed mas’uuliyadda amniga dalka.
Warbixin cusub oo ay soo saartay Amani Africa ayaa sheegtay in dhibaatada AUSSOM aysan ku koobnayn dhaqaale iyo taageero saadka ah, balse ay si weyn ugu xiran tahay khilaafaadka siyaasadeed ee Soomaaliya, kuwaas oo hakiyay geeddi-socodkii kala-guurka amniga.
Warbixintu waxay xustay in xiriirka Dowladda Federaalka iyo qaar kamid ah dowlad-goboleedyada uu sii xumaaday, halka khilaafaadka ku saabsan dastuurka iyo hannaanka doorashooyinku ay sii adkeeyeen jawiga siyaasadeed.
Amani Africa waxay sheegtay in xaaladdan ay adkeyneyso in si habsami leh loo fuliyo qorshaha ah in ciidamada Soomaaliyeed ay si buuxda ula wareegaan mas’uuliyadda amniga.
Dhammaadka taageerada UNSOS ee Diseembar 2026 ayaa AUSSOM gelinaya xaalad kale oo adag, maadaama howlgalka uu si weyn ugu tiirsan yahay taageerada saadka ee Qaramada Midoobay.
Shirkii Kampala ee 31-kii Luulyo ayaa soo jeediyay in AUSSOM loo sameeyo hannaan kala-guur ah oo soconaya 18 ilaa 24 bilood, balse Amani Africa ayaa ka digtay in ay adkaan karto helitaanka dhaqaalaha iyo taageerada saadka ee muddadaas.
“Maadaama uusan Midowga Afrika iyo shirkii Kampala ka soo bixin qorshe wadajir ah oo shaqeyn kara, waxaa ku waajibaya dal kasta oo ciidamada ku biiriya AUSSOM inuu si gaar ah u diyaarsado qorshihiisa.”
Warbixintu waxay ku talisay in la diyaariyo qorshe kale oo degdeg ah, oo ay ku jirto kala-guur lix ilaa 12 bilood ah, haddii aan la xaqiijin karin sii socoshada AUSSOM.
Sidaas darteed, mustaqbalka AUSSOM wuxuu hadda ku xiran yahay laba arrimood oo isku xiran: in la helo taageerada dhaqaale iyo saadka ee howlgalka, iyo in Soomaaliya xal u hesho khilaafaadkeeda siyaasadeed si ay u dardargeliso la wareegidda mas’uuliyadda amniga.
