Xil-ka-qaadista guddoomiyihii Maxkamadda Sare ee Soomaaliya, Dr. Baashe Yuusuf Axmed, iyo magacaabista Ibraahim Iidle Suleymaan ee xilkaas ayaa dhalisay su’aalo sharci iyo kuwo siyaasadeed, xilli dalka uu ka taagan yahay khilaaf xooggan oo ku saabsan dastuurka iyo hannaanka doorashooyinka.
Arrintan ayaa si gaar ah xasaasi u ah, maadaama Maxkamadda Sare ay gacanta ku hayso dacwad dastuuri ah oo uu gudbiyay madaxweynihii hore Sheekh Shariif Sheekh Axmed, taas oo ka dhan ah wax-ka-beddelkii dastuurka ee la ansixiyay bishii Maarso 2026.
Guddoomiyaha cusub ee maxkamadda sare ayaa hore u ahaa la-taliyaha sharciga ee Ururka Caddaaladda iyo Wadajirka, JSP, oo uu hoggaamiyo Madaxweyne Xasan Sheekh Maxamuud. Sidoo kale, sannadkii 2022 ayuu soo noqday la-taliyaha Madaxweynaha ee arrimaha sharciga.
Xiriirradaas shaqo ayaa dhaliyay su’aalo ku saabsan sida magacaabista cusub u saamayn karto kalsoonida lagu qabo dhexdhexaadnimada Maxkamadda Sare, gaar ahaan iyadoo ay horyaallaan dacwado la xiriira go’aannada dastuuriga ah ee dowladda Federaalka.
Dacwadda Sheekh Shariif ayaa Maxkamadda Sare loo gudbiyay 11-kii October 2026, isagoo su’aal geliyay habraacii loo maray wax-ka-beddelka dastuurka iyo waafaqsanaantiisa sharciga.
Markii dacwadda la gudbinayay, Dr. Baashe Yuusuf Axmed ayaa ahaa guddoomiyaha Maxkamadda Sare. Xil-ka-qaadistiisa iyo magacaabista guddoomiye cusub iyadoo kiisku weli taagan yahay ayaa keeneysa su’aalo ku saabsan halka uu marayo galka dacwadda iyo habka loo sii ambaqaadi doono.
Dowladda Federaalka iyo mucaaradka ayaa weli isku khilaafsan wax-ka-beddelka dastuurka, muddo-xileedyada hay’adaha dowladda iyo hannaanka doorashooyinka.
Xaaladdan dhexdeeda, Maxkamadda Sare ayaa laga sugayaa inay sharci ahaan ka garnaqdo muranka, iyadoo aan loo eegin danaha siyaasadeed ee dhinacyada is haya.
Magacaabista guddoomiyaha cusub waxay Maxkamadda Sare hor dhigtay laba arrimood oo waaweyn: ilaalinta madax-bannaanida garsoorka iyo xoojinta kalsoonida shacabka iyo dhinacyada siyaasadeed.
Waxaa weli la sugayaa sababta xil-ka-qaadista guddoomiyihii hore, halka ay marayso dacwadda Sheekh Shariif iyo habka loo sii wadi doono kiiska.
Magacaabistan ayaa kusoo beegmaysa xilli go’aannada Maxkamadda Sare ay saamayn ku yeelan karaan muranka dastuurka, doorashooyinka iyo xiriirka dowladda Federaalka iyo mucaaradka.
