Puntland ayaa Golaha Ammaanka ee Qaramada Midoobay ka codsatay inuu farageliyo khilaafka siyaasadeed ee sii xoogeysanaya Soomaaliya, taas oo muujinaysa in khilaafkii gudaha uu galay heer diblomaasiyadeed oo caalami ah.
Warqad ku taariikheysan 13-ka Sebtembar 2026, oo loo diray Xoghayaha Guud ee Qaramada Midoobay António Guterres iyo Madaxweynaha Golaha Ammaanka, Puntland waxay ku baaqday wada-hadal siyaasadeed oo degdeg ah, loo dhan yahay, iyadoo xubnaha Golaha Ammaanka ay fududeyn karaan geeddi-socodka, isla markaana bixin karaan dammaanad amni.
Puntland waxay soo jeedisay in wada-hadalku horseedo khariidad siyaasadeed oo la isku raacsan yahay iyo doorashooyin heer federaal iyo dowlad-goboleed.
Puntland waxay soo jeedisay lix qodob:
- In la qabto wada-hadal siyaasadeed oo degdeg ah oo loo dhan yahay.
- In Qaramada Midoobay si toos ah ula shaqeyso dowlad-goboleedyada.
- In dib loo soo celiyo Guddiga Khubarada Qaramada Midoobay.
- In dib-u-eegis lagu sameeyo xayiraadaha hubka.
- In la kordhiyo muddada howlgalka UNTMIS.
- In Golaha Ammaanka uu door weyn ka qaato khilaafaadka siyaasadeed iyo maamulka kheyraadka Soomaaliya.
Puntland waxay sidoo kale ka digtay in haddii aan la gaarin heshiis siyaasadeed, ay soo bixi karto dowlad barbar socota tan Muqdisho, iyadoo sheegtay in ugu dambeyn ay xitaa tixgelin karto inay si joogto ah u jarto xiriirka ay la leedahay Dowladda Federaalka Soomaaliya.
