Xiisad ayaa ka taagan deegaanka Warlaliska ee degmada Dayniile, halkaas oo dad shacab ah oo ku hubeysan middiyo iyo dhagxaan ay ku sii jeedaan goob ay ciidamada dowladda ka wadaan howlgallo burburin ah oo la xiriira muran dhuleed.
Dhaqdhaqaaqa dadka ayaa sababay iska horimaad dhex maray shacabka iyo ciidamada dowladda, iyadoo dadka deegaanka qaarkood ay diidan yihiin burburinta guryaha iyo barakicinta. Ilo wareedyo kala duwan ayaa sheegaya in ay jiraan dhimasho iyo dhaawac.
Muuqaallo laga soo duubay deegaanka Warlaliska ayaa muujinaya dad shacab ah oo sida qof dhaawac ah, xilli ay socdeen dibadbaxyada iyo xiisadda ka dhalatay burburinta guryaha.
Dhowr qof ayaa la sheegay inay dhaawacyo culus soo gaareen, kaddib markii ciidamada rasaas ku fureen dibadbaxayaasha, sida ay sheegeen ilo wareedyo kala duwan.
Howlgallada burburintu ayaa salka ku haya muran la xiriira lahaanshaha dhulal ku yaalla deegaanka.
Qaar ka mid ah dadka deegaanka ayaa dowladda ku eedeynaya inay waddo dhul-boob iyo barakicin, iyagoo ka soo horjeeda in guryahooda iyo hantidooda la burburiyo.
Ciidamada dowladda ayaa howlgallada ka wada goobaha lagu muransan yahay, halka dhaqdhaqaaqa dadka deegaanka uu abuuray xaalad amni oo kacsan.
Howlgallada burburinta dhulalka ee ka socda deegaannada Muqdisho ayaa marar badan sababa isku dhacyo u dhexeeya dadka deegaanka iyo ciidamada fulinaya amarada burburinta. Arrintan ayaa dib u soo nooleynaysa doodda ku saabsan ilaalinta xuquuqda lahaanshaha hantida iyo helitaanka hannaan sharci oo ay dadka shacabka ahi ku gudbin karaan cabashooyinkooda.
Ilaa hadda ma jiraan faahfaahin rasmi ah oo dhameystiran oo ku saabsan khasaaraha ka dhashay iska horimaadka. Waxaa la sugayaa tallaabooyinka ay maamulka degmada iyo hay’adaha amnigu qaadaan si looga hortago in xiisaddu sii kororto.
in Hamar