Jawiga xaafadda Bulo Xubeey ee Degmada Wadajir ayaa saaka u muuqda mid deggan, kadib dhaq-dhaqaaqyo ciidan, iyo cabsi laga qabay isku dhac hubeysan habeenkii xalay.
Ciidamo tiro badan ayaa lagu arkayay agagaarka Hotel Jazeera oo ah hoyga Ra’iisul Wasaarihii hore Xasan Cali Kheyre. Sidoo kale, dadka deegaanka ayaa sheegay in ciidamada ay shacabka ugu baaqayeen inay ka fogaadaan ama banneeyaan guryaha ku dhow halkaasi.
Askar Ilaalo la xiray
Xogaha la helayo ayaa sidoo kale tilmaamaya in ilaa lix kamid ah ciidamada ilaalada Xasan Cali Kheyre la xiray isla shalay xilli ay xisaddu kacsanayd. Ilaa hadda ma jiro war rasmi ah oo dowladda Federaalka kasoo saartay arrintaas ama sababta ciidamada loo geeyay xaafaddaas.
Qaar kamid ah dadka deggen Bulo Xubeey, gaar ahaan agagaarka Hotel Jazeera, ayaa la sheegay inay ka baxeen guryahooda. Dadkaasi ayaa ka cabsi qabay suurtagalnimada isku dhac hubeysan oo ka dhaca deegaanka.
Farriimaha BECO iyo Hormuud
Walaaca shacabka waxaa sii kordhiyay farriimo ay direen shirkadaha BECO iyo Hormuud, kuwaas oo lagu sheegay in korontada iyo adeegyada isgaarsiinta ay hakad geli karaan saacado cayiman oo habeenkii ah sababo la xiriira dayactir iyo arrimo farsamo.
Farriimahaasi ayaa dhalisay hadal-heyn iyo walaac ku saabsan xaaladda. Hase yeeshee, muddo kooban kadib, BECO iyo Hormuud ayaa ka laabtay qorshayaashii ay hore u shaaciyeen, iyadoo adeegyada caadiga ah ay sii socdeen.
in Hamar