Baarlamaanka cusub ee Itoobiya, Golaha Wakiillada Shacabka, ayaa Axmed Shide u doortay Afhayeen, iyadoo dalka uu galay xilli-baarlamaanigii toddobaad.
Axmed Shide, oo hore u soo noqday Wasiirka Maaliyadda Itoobiya, ayaa loo doortay xilka intii lagu guda jiray fadhigii ugu horreeyay ee baarlamaanka cusub. Wuxuu xilka kala wareegayaa Tagesse Chafo.
Warbaahinta dowladda Itoobiya ayaa sheegtay in si loo dhan yahay loo doortay, isla markaana xilka loo dhaariyey.
Ayelech Eshete, oo hore u ahayd Wasiir-dowlaha Waxbarashada, ayaa loo doortay ku-xigeenka Afhayeenka.
Doorashada Shide waxay muhiimad gaar ah u leedahay bulshada Soomaaliyeed ee Itoobiya, maadaama uu yahay mid ka mid ah siyaasiyiinta Soomaaliyeed ee ugu sarreeya dalka, isagoo hore u soo qabtay xilal federaal ah oo ay ka mid yihiin Wasiirka Maaliyadda, Wasiirka Gaadiidka iyo Wasiirka Arrimaha Isgaarsiinta Dowladda.
Isbeddelkan hoggaamineed ayaa ku soo beegmaya xilli Itoobiya ay bilaabayso wareeg siyaasadeed oo cusub oo shan sano ah, iyadoo Golaha Wakiillada uu maanta sidoo kale Abiy Ahmed u magacaabay inuu mar kale noqdo Ra’iisul Wasaaraha dalka.Dhanka aqalka sare, Golaha Federaalka Itoobiya ayaa Muferihat Kamil u doortay Afhayeen, halka Desta Ledamo loo doortay ku-xigeen.
Baarlamaanka cusub ayaa xilka la wareegaya iyadoo Itoobiya ay wajahdo caqabado siyaasadeed iyo amni, oo ay ka mid yihiin dagaallo ka soo cusboonaaday waqooyiga dalka iyo xiisadaha sii kordhaya ee kala dhexeeya Eritrea iyo dhinacyo kale oo gobolka ah.
in Hamar