Tirada maraakiibta ganacsiga ee maalin kasta ka gudbaysa marin-biyoodka Bab el-Mandeb ayaa gaartay 28 markab bishan Luulyo, taasoo noqotay tiradii ugu badnayd afartii maalmood ee u dambeysay kaddib hoos u dhac xooggan oo ka dhashay xiisadaha ka taagnaa Badda Cas.
Maraakiibtaas waxaa ka mid ahaa 12 markab oo u socday gudaha Badda Cas iyo 16 markab oo ka baxayay, iyadoo 14 ka mid ahi ay ahaayeen booyado shidaal qaada.
Wakaaladda Reuters ayaa sidoo kale sheegtay in markabka weyn ee shidaalka qaada ee calanka Hong Kong sita, New Pearl, oo siday ku dhowaad 2 milyan oo foosto oo shidaal cayriin ah oo Sacuudigu leeyahay kuna wajahnaa Shiinaha, uu si nabad ah uga baxay Badda Cas. Tani waxay ka dhigeysaa New Pearl markabkii afraad ee weyn ee Shiineys ah ee mara waddadan tan iyo markii Xuutiyiintu ku dhawaaqeen xannibaadda maraakiibta lala xiriiriyo Sacuudiga.
Kororka socdaalka maraakiibta ayaa muujinaya in qaar kamid ah shirkadaha maraakiibta ay si taxaddar leh ugu soo laabanayaan isticmaalka waddadan, iyadoo ay jiraan calaamado muujinaya horumar laga gaarayo dadaallada dhexdhexaadinta ee u dhexeeya Mareykanka iyo Iiraan.
Tirada maraakiibta weli way ka hooseysaa heerkii ugu sarreeyay bishii Luulyo, markaas oo celcelis ahaan ay maalin kasta marayeen 46 markab, halka Xuutiyiintuna aysan weli qaadin xannibaaddooda ama wax ka beddelin siyaasaddooda ku aaddan bartilmaameedsiga maraakiibta.
Kororkan ayaa imanaya iyadoo la soo sheegayo in ciidamada Mareykanka iyo Iiraan ay ka fogaadeen iska horimaad toos ah muddo saddex maalmood oo xiriir ah, halka dadaallada dhexdhexaadinta ee ay hoggaaminayaan Qadar iyo Pakistan la sheegay inay horumar ka sameeyeen qorshe xabbad-joojin ku meel gaar ah.
Si kastaba ha ahaatee, lama shaacin wax heshiis ah oo si gaar ah u khuseeya Xuutiyiinta ama ammaanka maraakiibta ee Badda Cas.
Falanqeeyayaashu waxay sheegayaan in soo kabashadan ay tahay calaamad hore oo muujinaysa in kalsoonida shirkadaha maraakiibta ay soo hagaagayso. Hase yeeshee, waxa go’aamin doona in isbeddelkani sii socdo waa haddii tirada maraakiibta sii kororto ama haddii uu dhaco weerar kale oo lagu qaado maraakiibta ganacsiga.
in Hamar