Kaddib walaac muddo ka taagnaa mustaqbalka taageerada Qaramada Midoobay ee Soomaaliya, Mareykanka ayaa soo jeediyay in UNSOS aan hal mar la xirin, balse loo sameeyo 12 bilood oo kala-guur ah. Tani waxay AUSSOM iyo Soomaaliya siin kartaa waqti dheeraad ah oo ay ku diyaariyaan nidaam cusub. Laakiin waxaan caddeyn waxa dhacaya marka 12-kaas bilood ay dhammaadaan?
Sida lagu sheegay warqad aan rasmi ahayn oo uu Mareykanku diyaariyay, Washington waxay soo jeedisay in taageerada UNSOS si tartiib ah loo soo afjaro muddo 12 bilood ah, kadib marka uu dhammaado muddada hadda ee AUSSOM, oo ku eg 31-ka December 2026.
UNSOS wuxuu door muhiim ah ka ciyaaraa taageerada howlgalka AUSSOM. Waxaa ka mid ah gaadiidka, shidaalka, adeegyada caafimaadka, isgaarsiinta, dhismaha iyo dayactirka qalabka, iyo adeegyo kale oo saadka ah. Marka UNSOS laga hadlo, ma aha oo un xafiis Qaramada Midoobay leedahay. Waa laf-dhabarka saadka ee qeyb weyn ka mid ah howlgalka AUSSOM.
Haddii qorshaha 12-ka bilood ah la meel mariyo, Soomaaliya, Midowga Afrika iyo Qaramada Midoobay waxay heli doonaan waqti dheeraad ah oo ay ku diyaariyaan hannaan kale oo lagu sii wado taageerada saadka iyo howlgalada amniga.
Taasi waxay yarayn kartaa khatarta ka dhalan karta in taageerada UNSOS si degdeg ah loo joojiyo. Laakiin weli ma jiro go’aan kama dambeys ah. Warqadda Mareykanka waa mowqif gorgortan, ee ma aha go’aan Washington ay si rasmi ah u qaadatay. Wadahadalladuna weli way socdaan.
Soomaaliya iyo qaar ka mid ah dalalka ciidamadooda ku biiriya AUSSOM ayaa horey u doonayay in taageerada UNSOS la sii wado muddo ka badan hal sano. Sidaas darteed, waxa hadda miiska saaran waa su’aal ku saabsan waqtiga kala-guurka iyo cidda qaadaysa mas’uuliyadda taageerada UNSOS ka gadaal.
Haddii UNSOS si degdeg ah loo xiro, waxaa jiri kara khatar ah in AUSSOM iyo ciidamada Soomaaliyeed ay wajahaan farqi ku yimaada adeegyada muhiimka ah ee saadka. Haddii 12-ka bilood la helo, dhinacyadu waxay heli doonaan waqti ay ku dhisaan ama ku heshiiyaan hannaan kale. Laakiin waqtigaas waa in loo isticmaalaa in xal waara la diyaariyo, ee uusan noqon kaliya dib-u-dhac.
