Xiisadda u dhexeysa Maraykanka, Israa’iil iyo Iiraan ayaa gaartay heer cusub—kaddib markii ugu horreysay la soo sheegay in diyaarado dagaal oo Maraykan ah lagu soo riday gudaha Iiraan iyo agagaarkeeda.
Iiraan ayaa sheegtay inay soo riday laba diyaaradood: F-15E Strike Eagle iyo A-10 Warthog—kuwaas oo ka mid ah diyaaradaha ugu muhiimsan ee ciidamada cirka Maraykanka.
Pentagon-ka ayaa xaqiijiyay in mid ka mid ah duuliyeyaasha la badbaadiyay, halka mid kale weli la la’yahay.
Weerar & Jawaab Celin
Dagaalkan ayaa bilawday 28-kii Febraayo 2026, kaddib markii Maraykanka iyo Israa’iil ay weerareen xarumaha nukliyeerka iyo gantaalaha Iiraan.
Tan iyo markaas, gobolka waxaa ka socday is-weydaarsi gantaallo iyo drones ah
Soo ridista diyaaradaha Maraykanka waxay calaamad u tahay isbeddel weyn—waxayna su’aal gelinaysaa sheegashada Maraykanka ee ah inuu si buuxda u maamulo hawada Iiraan.
Hadalada Trump: Isburin Mise Istaraatiijiyad?
Madaxweyne Donald Trump ayaa hadallo isburinaya jeediyay 48-kii saac ee u dambeeyay—marna wuxuu sheegay in dagaalku “ku dhow yahay dhammaad,” marna wuxuu ku hanjabay weerarro cusub oo culus.
Wuxuu sidoo kale uga digay Iiraan inay furto marinka Hormuz, haddii kale uu burbur xooggan u geysan doono
Iiraan ayaa diiday xabbad-joojin la soo jeediyay, waxayna sheegtay inay sii wadi doonto dagaalka ilaa ciidamada shisheeye ay ka baxaan gobolka.
Saameynta Gobolka & Dhaqaalaha
Dagaalku wuxuu si weyn u saameeyay dalalka Khaliijka, kaddib markii Iiraan ay beegsatay xarumo shidaal oo ku yaalla Sacuudiga, Imaaraadka iyo Kuwayt.
Suuqa caalamka ayaa si degdeg ah looga dareemayay —qiimaha shidaalka ayaa kor usii kacay, halka marinka Hormuz uu noqday mid halis ah oo aan la mari karin
Marinka Hormuz waa halbowlaha tamarta adduunka—ku dhowaad 20% shidaal calaamka ayaa halkii maalin mara, wax kasta oo halkaa ka dhaca waxay si toos ah u saameeyaan dhaqaalaha caalamka, gaar ahaan dalalka sida Soomaaliya oo ku tiirsan shidaalka dibadda.
Soo ridista diyaaradaha Maraykanka waxay beddeshay jihada dagaalka—iyadoo su’aasha ugu weyn ay tahay: ma la xakameyn karaa xiisaddan, mise waxay u gudbi doontaa wajigii ugu khatarta badnaa ee colaadda caalamka?
in Hamar